ခန္ဓာကိုယ်မှာ ရှိတဲ့အဆီတွေထဲမှာ ဝမ်းဗိုက်က အဆီကတော့ ဖယ်ရှားရအခက်ဆုံးပဲဖြစ်ပါတယ်။ ပြင်းထန်တဲ့လေ့ကျင့်ခန်းတွေ ပင်ပန်းတဲ့လေ့ကျင့်ခန်းတွေ အမျိုးစုံ ပြုလုပ်ပေမယ့်လည်းပြုလုပ်နည်းမမှန်တဲ့အခါ၊ အမျိုးအစားမမှန်တဲ့ လေ့ကျင့်ခန်းတွေဖြစ်နေတဲ့အခါ ခုတ်ရာတခြား၊ ရှရာတခြားနဲ့ အဆီပိုတွေ မကျဘဲ ဝမ်းဗိုက်က ပိုတောင် ဖောင်းလာတတ်ကြပါတယ်။
ပျိုမေလေးတို့ ခုတ်ရာတခြား၊ ရှရာတခြားဖြစ်မှာ စိတ်ပူတဲ့အတွက် ဝမ်းဗိုက်အဆီချချင်သူတွေအတွက် သီးသန့်ပြုလုပ်ပေးရမယ့် လေ့ကျင့်ခန်းလေးတွေကို ဝေမျှပေးချင်ပါတယ်။
(၁) လှဲလျောင်းရင်း စက်ဘီးစီးပါ
လေ့ကျင့်ခန်း ပြုလုပ်တဲ့ဖျာပေါ်မှာ လှဲလျောင်းနေပါ။ လက်နှစ်ဖက်ကို နားနောက်ထားထားပြီး ခြေထောက်နှစ်ဖက်ကို အပေါ် ထောင်ထားပါ။ ဘယ်ဘက်ပုခုံးကြွလိုက်တဲ့အချိန်မှာ ညာဒူးကို ကွေးပြီး ဘယ်တံတောင်နဲ့ ညာဒူးကို ထိကပ်လိုက်ပါ။ မူလအနေအထားအတိုင်း ပြန်နေပါ။တစ်ဖန် ညာပုခုံး ကြွပြီး ညာတံတောင်နဲ့ ဘယ်ဒူးကို ထိကပ်လိုက်ပါ။ ဘယ်ညာကို တစ်ကြိမ်လို့ သတ်မှတ်ပြီး အကြိမ် (၃၀) ပြုလုပ်ပေးလိုက်ပါ။
(၂) ခြေထောက်နှစ်ချောင်း ထောင်မတ် လေ့ကျင့်ခန်း
ပုံပါအတိုင်း ခြေထောက် နှစ်ချောင်းကို မတ်မတ်ထောင်ထားပါ။ လက်နှစ်ဖက်ကို နားနောက် ပို့ထားပါ။ ထို့နောက် ဗိုက်ကြွက်သား အသုံးပြုပြီး ခန္ဓာကိုယ်အပေါ်ပိုင်း ကြွလိုက်တဲ့အချိန်မှာ အသက် ရှုထုတ်ပါ။
ထိုအနေအထားအတိုင်း ၅ စက္ကန့်၊ ၁၀ စက္ကန့်ခန့် နေပါ။ ပြီးမှ မူလအနေအထားအတိုင်း ပြန်နေပါ။ ၁၅ ကြိမ် ပြုလုပ်ပေးရပါမယ်။ သတိထားရမယ့် တစ်ချက်က ခန္ဓာကိုယ် အပေါ်ကြွတဲ့အချိန်မှာ ဗိုက်ကြွက်သားကိုပဲ အသုံးပြုပေးပါ။ လည်ပင်းကြွက်သားအသုံးပြုတဲ့အခါ လည်ပင်းနာနိုင်ပါတယ်။
(၃) ဗိုက်ကြွက်သား အသုံးပြုကာ ထိုင်ရမယ့် လေ့ကျင့်ခန်း
အရင်ဆုံးလှဲလျောင်းနေပြီး ဒူးနှစ်ဖက်ကို ထောင်ထားပါ။ လက်နှစ်ဖက်ကို ဆန့်တန်းထားပါ။ ထို့နောက် ဗိုက်ကြွက်သား အသုံးပြုရင်း ဖြည်းဖြည်းလေး ထိုင်လိုက်ပါ။ ပြီးရင် မူလအနေအထားအတိုင်း ပြန်နေပါ။ အကြိမ် ၃၀ ပြုလုပ်ပါ။ (လည်ပင်းကြွက်သားနဲ့ ဦးခေါင်းကို လုံးဝ အသုံးမပြုပါနဲ့)
(၄) Plank ထောက်ရင်း တင်ပါးအပေါ် အောက်ရွှေ့ လေ့ကျင့်ခန်း
ပုံပါအတိုင်း ခြေထောက်နှစ်ခုကို ထပ်ထားကာ ညာဘက်လက်ကို ဦးခေါင်းနောက်ပို့ထားပြီး ဘယ်ဘက်တံတောင် ထောက်ထားလိုက်ပါ။ ခန္ဓာကိုယ်အနေအထားက ခြေထောက်ကနေ ဦးခေါင်းအထိ မျဉ်းဖြောင့် ပုံသဏ္ဍာန်ဖြစ်နေရ ပါမယ်။ ထို့နောက် တင်ပါးကို ကြမ်းပြင်ဆီ ရွှေ့ချလိုက်၊ တစ်ဖန် အပေါ်သို့ ပင့်တင်လိုက် ပြုလုပ်ပေးရပါမယ်။ ၄ ကြိမ် ပြုလုပ်ပေးပါ။ ပြီးတဲ့အခါ ခန္ဓာကိုယ် ဘက်ပြောင်းပြီး ၄ ကြိမ် ထပ်မံပြုလုပ်ပါ။
(၅) ဒူးထောက်၊ လက်မြှောက် လေ့ကျင့်ခန်း
အရင်ဦးဆုံး ဒူးနှစ်ဖက်နဲ့ လက်ဖဝါးနှစ်ဖက် ထောက်နေပါ။ ဘယ်လက်ကို အရှေ့သို့ ဆန့်တန်းနေချိန် ညာခြေကို နောက်သို့ ဆန့်ထုတ်လိုက်ပါ။ ထိုအနေအထားအတိုင်း ၁ စက္ကန့် နေပါ။
ပြီးရင် မူလအနေအထားအတိုင်း ပြန်ပြောင်းပြီး ညာလက် ရှေ့ထုတ်၊ ဘယ်ခြေ နောက်ပို့ ပြန်လုပ်ပေးလိုက်ပါ။ ဘယ်ညာကို တစ်ကြိမ်လို့ သတ်မှတ်ပြီး အကြိမ် ၃၀ လုပ်ရပါမယ်။
(၆) မြွှေဟောက်ပုံသဏ္ဍာန် လေ့ကျင့်ခန်း
ပုံမှာ ပြထားတဲ့အတိုင်း ခြေထောက်နှစ်ချောင်း စဉ်းထားပြီး ဝမ်းဗိုက်ဖြင့် လှဲလျောင်းနေပါ။ ထို့နောက် ဝမ်းဗိုက်ကြွက်သားရဲ့အားကို အသုံးပြုပြီး ဝမ်းဗိုက်ကို ဆွဲဆန့်ကာ လက်ဖဝါးထောက်ပြီးနောက် ခန္ဓာကိုယ် အပေါ်ပိုင်း ကြွလိုက်ပါ။
လည်ပင်းကို ရှည်အောင် ဆန့်ထုတ်ထားပြီး အသက်ပြင်းပြင်း ရှုထုတ်ပါ။ ထိုအနေအထားအတိုင်း ၁၅ စက္ကန့်ကနေ စက္ကန့် ၃၀ အထိ နေပါ။ ထို့နောက် မူလအနေအထားအတိုင်း ပြန်နေပါ။
ဝမ်းဗိုက်ပြားချပ်ချင်တယ်ဆိုရင် ဒီလေ့ကျင့်ခန်းတွေကို မှန်မှန်ပြုလုပ်ပေးရမယ့်အပြင် အဆီအဆိမ့်များတာလည်း ရှောင်ကြဉ်ပြီး ရေများများသောက်ပေးဖို့လည်း မမေ့ရဘူးနော်။