“မန်ကျည်းခေါက်” ရဲ့ ထူးခြားလှတဲ့ ဆေးဖက်ဝင်လျှို့ဝှက်ချက်များ

နေအပူဒဏ်ကိုအန်တုရင်း ရောဂါဘယတွေကိုပါ နှိမ်နင်းပေးနိုင်တဲ့ “မန်ကျည်းခေါက်” ရဲ့ ထူးခြားလှတဲ့ ဆေးဖက်ဝင်လျှို့ဝှက်ချက်များ

နွေဦးကဗျာတွေထဲမှာ အညာမြေရဲ့ အလှကို ပုံဖော်ပေးလေ့ရှိပြီး ပူပြင်းလှတဲ့ နေ့ရက်တွေမှာ လမ်းသွားလမ်းလာ ခရီးသည်တွေအတွက် အေးမြလှတဲ့ အရိပ်အာဝါသကို ပေးစွမ်းနိုင်တာကတော့ အားလုံးသိကြတဲ့ “မန်ကျည်းပင်” ကြီးတွေပဲ ဖြစ်ပါတယ်။ မန်ကျည်းပင်လို့ ပြောလိုက်ရင် လူအများစုရဲ့ လျှာဖျားမှာ ချဉ်ချဉ်တောက်တောက် မန်ကျည်းသီးစိမ်း၊ ဟင်းချက်ရင် မပါမဖြစ် မန်ကျည်းသီးမှည့် ဒါမှမဟုတ် ခံတွင်းမြိန်စေမယ့် မန်ကျည်းရွက်နုလေးတွေကိုပဲ ပြေးမြင်မိကြမှာ သေချာပါတယ်။ ဒီအရာတွေက စားလို့သောက်လို့ ကောင်းရုံတင်မကဘဲ ကျန်းမာရေးအတွက်ပါ ဘယ်လောက်ဆေးဖက်ဝင်လဲဆိုတာ အားလုံးသိပြီးသားပါ။

ဒါပေမဲ့ အမှန်တကယ်တော့ မန်ကျည်းပင်ကြီးဟာ အရွက်နုလေးတွေကစလို့ အစေ့၊ ပင်စည်၊ အသီးနဲ့ အမြစ်အထိ တစ်ပင်လုံး ခြေဆုံးခေါင်းဆုံး နေရာလပ်မကျန် အသုံးဝင်လှတဲ့ သဘာဝရဲ့ လက်ဆောင်မွန်ကြီး ဖြစ်ပါတယ်။ အခုတစ်ခေါက်မှာတော့ လူသိနည်းနေသေးတဲ့၊ ဒါပေမဲ့ အစွမ်းထက်မြက်လှတဲ့ မန်ကျည်းပင်စည်က “မန်ကျည်းခေါက်ထူထူလေးတွေ” ရဲ့ အံ့မခန်း ဆေးဖက်ဝင်ပုံတွေကို Hug Myanmar ပရိသတ်ကြီးအတွက် အသေးစိတ် ဝေမျှပေးသွားမှာမို့ အတူတူ ဆက်ဖတ်ကြည့်လိုက်ရအောင်နော်။

မန်ကျည်းခေါက် ဆိုတာ ဘာလဲ?

မန်ကျည်းခေါက်ဆိုတာကတော့ ရင့်ကျက်တည်ငြိမ်လှတဲ့ မန်ကျည်းပင်စည်ကြီးတွေနဲ့ အကိုင်းရင့်ကြီးတွေရဲ့ အပြင်ဘက်ကနေ သဘာဝအတိုင်း ကာရံပေးထားတဲ့ အညိုရောင်အပွေးထူထူ အခေါက်လေးတွေကို ဆိုလိုတာပါ။ သူ့မှာ သဘာဝအလိုက် အရောင်ထွက်တဲ့ “မန်ကျည်းအနီခေါက်” နဲ့ “မန်ကျည်းအဖြူခေါက်” ဆိုပြီး နှစ်မျိုးနှစ်စား တွေ့ရတတ်ပါတယ်။

ခန္ဓာကိုယ်ကို အကျိုးပြုစေမယ့် မန်ကျည်းခေါက်ရဲ့ ဆေးဖက်ဝင်အာနိသင်များ

၁။ ရင်ပြည့်ဝမ်းကယ် ရောဂါဘယတွေကို နှုတ်ဆက်လိုက်ပါ

ဗိုက်ထဲကနေ တရွှတ်ရွှတ်နဲ့ စူးပြီးအောင့်တာ၊ လေထိုးလေအောင့်ဖြစ်တာ၊ စားလိုက်တဲ့ အစားအသောက်တွေ မကျေသလို ခံစားရတာ၊ အော့အန်ချင်တာ၊ ခံတွင်းပျက်ပြီး ဘာမှမစားချင်တာနဲ့ ရင်ပူစေတဲ့ စားချဉ့်ရည်ပြန်ဆန်တက်တဲ့ ဝေဒနာတွေအတွက် မန်ကျည်းခေါက်က အစွမ်းထက် သဘာဝဆေးတစ်ခွက်ပါ။ ခံတွင်းကောင်းပြီး ဝမ်းဗိုက်ပြဿနာတွေ ကင်းဝေးစေဖို့အတွက် မန်ကျည်းခေါက်ကို သဘာဝပျားရည်စစ်စစ်လေးနဲ့ တွဲဖက်ပြီး မှီဝဲအသုံးပြုပေးနိုင်ပါတယ်။

၂။ မျက်စိနာဝေဒနာကို အေးမြစွာ သက်သာစေခြင်း

မျက်စိနာလို့ စူးစပ်ကိုက်ခဲနေတဲ့အခါမျိုးမှာ ရေစင်အောင်ဆေးကြောထားတဲ့ မန်ကျည်းခေါက် (အထူးသဖြင့် မန်ကျည်းအနီခေါက်) ကို ကျောက်ပျဉ်ပေါ်မှာ စင်ကြယ်စွာ သွေးပြီး မျက်လုံးတစ်ဝိုက်ကို ကွင်းလူးပေးခြင်းဖြင့် ပူစပ်ပူလောင်ဖြစ်ခြင်းကို သက်သာစေပြီး မျက်စိအေးစေပါတယ်။

၃။ မိတ်ဖု၊ ယားနာနဲ့ ထိခိုက်ဒဏ်ရာများအတွက် အိမ်သုံးဆေးမြီးတို

နွေပူပူမှာ ထွက်တတ်တဲ့ မိတ်ဖုတွေနဲ့ အသားအရေ ယားယံတဲ့ အဖုအပိမ့်တွေ သက်သာစေဖို့ မန်ကျည်းခေါက်ကို ရေကျဲကျဲလေး သွေးပြီး လိမ်းကျံပေးနိုင်ပါတယ်။ ဒါ့အပြင် ပုရွက်ဆိတ်၊ ခါချဉ်နဲ့ အင်းဆက်ကိုက်လို့ ယားယံရောင်ရမ်းတဲ့ နေရာတွေကိုလည်း သွေးလူးပေးလို့ ရသလို၊ ထိခိုက်ဒဏ်ရာရတဲ့အခါ ပိုးမဝင်စေဖို့အတွက် သန့်စင်တဲ့ မန်ကျည်းခေါက်ကို ရေနွေးနဲ့ ပြုတ်ပြီး ဒဏ်ရာဆေးကြောတဲ့ အရည်အဖြစ်လည်း အသုံးပြုနိုင်ပါတယ်။

၄။ ဆီးလမ်းကြောင်းပြဿနာများကို ဖြေရှင်းပေးခြင်း

ဆီးသွားရခက်တာ၊ ဆီးအောင့်တာ၊ ဆီးသွားရင် ကျဉ်စပ်စပ်ဖြစ်နေတာ စတဲ့ ဆီးလမ်းကြောင်းဆိုင်ရာ မအီမသာဖြစ်မှုတွေကို သက်သာလျော့ပါးစေဖို့အတွက်လည်း မန်ကျည်းခေါက်ကို အသုံးပြုနိုင်ပါတယ်။

၅။ သွေးသားသန့်စင်ပြီး အသားအရေ ပြဿနာများကို ကုသပေးခြင်း

သွေးမသန့်တာကြောင့် ခန္ဓာကိုယ်မှာ ဖြစ်ပေါ်တတ်တဲ့ အရေပြားရောဂါတွေ၊ ဓာတ်မတည့်မှုကြောင့် အင်ပျဉ်ထတာမျိုးတွေကို သက်သာစေဖို့ မန်ကျည်းခေါက်ရဲ့ ဆေးဖက်ဝင်အာနိသင်က ကူညီပေးနိုင်ပါတယ်။

၆။ ဝက်ခြံကင်းစင်ပြီး နေလောင်ဒဏ်ကို ကာကွယ်ပေးခြင်း

မန်ကျည်းခေါက်ကို စနစ်တကျ သွေးပြီး မျက်နှာပေါ် လိမ်းပေးခြင်းက အရေပြားပေါ်က ဆဲလ်သေတွေကို ဖယ်ရှားပေးတဲ့အတွက် ဝက်ခြံတွေကို သက်သာလျော့ပါးစေပါတယ်။ ဒါတင်မကသေးပါဘူး၊ နေလောင်ဒဏ်ကြောင့် အသားအရေ ပျက်စီးခြင်းကနေလည်း သဘာဝအတိုင်း ကာကွယ်ပေးနိုင်တဲ့ အာနိသင် ရှိပါသေးတယ်။

သတိပြုရမယ့် ဘေးထွက်ဆိုးကျိုးနှင့် အချက်အလက်များ

• လေချုပ်စေနိုင်ခြင်း: မန်ကျည်းခေါက်ကို အရေပြားပေါ်မှာ တိုက်ရိုက်လိမ်းကျံတာက ဘာဘေးထွက်ဆိုးကျိုးမှ မရှိပေမယ့်၊ အလွန်အကျွံ စားသုံးရင်တော့ လေချုပ်တာမျိုး ဖြစ်တတ်ပါတယ်။

• အထူးသတိပြုရန်: မန်ကျည်းခေါက်က ဆေးဖက်ဝင်တယ်ဆိုသော်လည်း မွေးကင်းစကလေးငယ်များ၊ ကိုယ်ဝန်ဆောင်မိခင်များ၊ နို့တိုက်မိခင်များနှင့် ရောဂါအခံရှိသူများအနေဖြင့် အသုံးမပြုမီ တတ်ကျွမ်းနားလည်သည့် ဆရာဝန်များနှင့် သေချာတိုင်ပင်ဆွေးနွေးပြီးမှသာ အသုံးပြုသင့်ပါတယ်။